广州往事唔吹水嘅广州塔？广州花城往事

不过讲开又讲，按广州人随意包容注重实际嘅性格，呢个新电视塔叫乜嘢名有乜紧要？反正嗰座秀美同呢座城市气候人文及性格相融和嘅城市标志性建筑就摆喺嗰度，同古老嘅琶洲塔相伴，永远都唔会走，亦冇人会记错佢嘅方位。大家心中有佢，内心不断参与命名，嗰塔唔系更显得有生命力咩？

广州塔真系养眼，每次同佢相对，总会赞叹设计者嘅手笔才气，想探究马克与芭芭拉呢对夫妇如何深得此方水土人情之精髓，进而创造咗这一尤物。佢嘅妖娆妩媚，犹在幻变嘅灯光之下，缓慢地扭动着腰肢，甚至使我等有唔敢凝视太久之感。而当我想同佢对话嘅时候，又觉得仲未揾到最美又最能够令人满意嘅名字，真系纠结。

冇错，广州经广泛征集社会意见，在公布众多提议名称，并由大众代表投票选择“广州塔”命名巳属最好，但仲系觉得呢个名“大”咗啲，个性不足，未能表现位于广州珠江边呢个塔嘅独特风韵。以“广州”命名长处系直接，却稍显直白；广州塔又有“小蛮腰”之別名，呢个名全中国都懂，可惜好多广州人叫起上嚟唔得自然，有用文言书面语讲嘢嘅感觉，北味较浓，南味却不足，气象亦小咗一啲；记得仲有一个“扭纹柴”嘅提名，当时附议嘅广州人都唔少，应该承认呢个名有粤味，够通俗，又几形象，不过就太俗啦，美感、想象力不足，登唔上大雅之堂。谂嚟谂去，选嚟选去，始终未揾起到最满意嘅名，只能用冇乜特色嘅广州呢个城市嘅名称命名。或者又中咗嗰句：“广州人识得生仔唔识得改名？”呢次广州市可是已经向全世界广泛征集塔名口架喇。可能均以美中不足为美，就好似断臂嘅维纳斯咁。

此文写于去年，放在草稿夹中，2014.12.29日，见贵报刊登了这个塔竟打出了几个广州话字眼“广州唔吹水”，突然揾到呢篇文章嘅“眼”，虽然呢五个字只系商家出钱喺度做公益广告，但就觉得呢五个字几有广州特色，因为佢不但定义咗塔的身份，仲定义咗广州人嘅性格。可能有啲外地人睇唔明，但只要真系想了解其中嘅含义一定可以。不但可以，或者还可以进一步通过了解“广州唔吹水”进而了解广州话及粤文化嘅妙处。

华美花城，亭亭玉立于广州新中轴线上嘅广州塔诞生几年啦，而家经巳美貌、美名扬遍天下，身为广州人嘅我自然欢喜有加。佢好似系我哋广州一个温雅嘅女性，企喺珠江边，白天沐浴朝阳，晚头变换彩衣，显尽南国水润灵秀娴静生动人性之美，喺烟雨迷离嘅日子，则似一位披着薄薄雨衣嘅南方淑女。如果要揾一种岭南嘅植物类比，我谂应选修长秀气婀娜多姿嘅芭蕉。芭蕉躯干修长，珠江之风吹嚟，绿叶轻曼摇弋，大方之余似又含羞，喺一片低矮浓绿嘅水稻田基玉立，唔正系此君？

潘健生